NHS sommerregatta 25. og 26.august

I seglasen laurdag var det lagt opp til ny rute då det var Kystsogearrangement på Holmeknappen. Start ved Krossnessundbrua. Deretter rundt staken ved Askeneset. Til Holmeknappen, og retur også rundt staken ved Askeneset.
Kilroy, Hanseaten, Olliver, Tjorven, Vito, Jenny og X-faktor stilte til start. Amante var visst også med ei stund!
X-faktor hadde Eivind og eg som mannskap. I starten var det ca 2 m/s frå S/SV. Me kom greit ut på kryssen mot Askeneset. Litt før Askeneset segla Kilroy forbi oss. Etter runding Askeneset sette me spinnaker og segla mot Holmeknappen. No minka det veldig på vinden.

På veg mot Holmeknappen. Lite vind !

Etter ei stund med lite/ingen vind, kom vinden igjen frå NV. No vart det kryss mot Holmeknappen. Kilroy leda også ved runding der. No vart det spinnakerseglas mot Askeneset. Me segla etter kvart forbi Kilroy. Vinden minka igjen og det var til tider null vind. Det vart avkorting ved Askeneset. Me gjekk i mål med genoa  etter vel 3 timars seglas. Kilroy var 15 minuttar etter oss i mål.

Søndag starta regattaen kl. 11. I dag var i tillegg barnebarn Wilgot mannskap.
I dag var løpet frå Krossnessundbrua til Bakarvågen og tilbake.
Desse stillte opp søndag: Kilroy, Anchrissi, Hanseaten, Tjorven, Jenny, Vito og X-faktor.
Starten gjekk i ca. 2 - 3  m/s frå S/SV. Me kom godt ut i starten og leda til me nærma oss runding ved Bakarvågen. Då segla Kilroy forbi oss og runda rett framfor oss. Vinden låg for det meste på rundt 4 m/s, men i ei byge var vinden oppe i 6 m/s.
Etter runding sette me spinnaker og me tok etterkvart igjen Kilroy.

Ved Morvik minka vinden, men tok seg etterkvart litt opp igjen. Kilroy og X-faktor skifta om å vera fremste båt, og i mål var Kilroy 20 sekund framfor oss. Siste 10 minuttar av seglasen kom vinden opp i 5 m/s.
Me brukte 2 timar og 54 minutt på seglasen.
Det vart dermed seier begge dagar og også samanlagt.

Wilgot tar imot pokal for 1.plassen.

Her er sporet for søndagens seglas

Nokre bilder frå Norgeshus Seilmakeren doublehanded 2018

Fotograf: Trond J. Hansen

Ny trimline i dacron-storseglet

Trimlina i dacron-storseglet slitna når eg reva på laurdag.
I dag tidleg kjørte eg inn til Seilmaker Iversen, og Magne sette i ny trimline medan eg venta.
God service ! Det er 2:1 utveksling på trimlina, og det var i utvekslinga at lina hadde slitna.

Rormannen singlehanded 2018

Laurdag 16.juni var det klart for Rormannen singlehanded. Kun 3 båtar stillte til start: Tjorven (Bavaria 41), Jenny (Bavaria 40 cr) og X-faktor. Bjørn er på ferie og Kjell H var på Bergenfest. Jan Vidar har flytta båten til BS.
Yr meldte fint vær med vind frå sør. 5 m/s på Byfjorden og 9 m/s ved Nordre Marholmen.
Starten gjekk kl. 11 ved Frekhaug kai. Kom greit ut for styrbord hals og slo ved Salhus. Deretter mot Askeneset. Vinden var på ca. 7 m/s. Eg segla med rullefokk og dacronstorseglet. Dacronstorseglet vert flatt og fint når eg stramar akterstaget godt.
Me skulle segla sør til posisjon N 60.29 i Byfjorden, så det vart eitt slag til når eg nærma meg Askeneset. Tjorven hang godt på. Jenny ligg meir forsiktig lenger bak.

Etter runding bar det nordover Herdlefjorden.
Etter Askeneset fant eg ut at det var forhold for spinnakersegling. Oppdaga når eg skulle laga til spinnakeren at den ikkje var pakka skikkeleg! Var berre grytt ned i bagen. Fekk orden på det etterkvart og heiste opp. Vindvinkelen var no skarpare og vindstyrken varierte mykje. Dette gjekk ikkje. Etter ein broach falt eg av og berga spinnakeren. Hadde likevel god fart nordover. Hjeltefjorden er vanskeleg å segla i sørleg vind. Det vert stor variasjon i både vindvinkel og vindstyrke.
Når eg nærma meg Det naua hadde det vore mogeleg å segla spinnaker ei stund, men eg var usikker på forholda. Med forrige broach friskt i minne vart det med tanken. Møtte hurtigruteskipet "Kong Harald" på det smalaste i Skjelangersundet så det var like greit å ikkje ha spinnaker oppe.
Passerte Nordre Hunden kl. 13.20.
No var det nordover Hjeltefjorden mot Nordre Marholmen. Vinden auka på i Hjeltefjorden. Låg på mellom 8 og 12 m/s. Var oppe i over 9 knop på loggen.
Før eg starta på kryssen etter Nordre Marholmen måtte eg ta eit rev i storseglet og rulla inn litt på fokken. Dette måtte gjerast på innsida av Marholmen. Det blas godt også der, så eg kjempa litt med å få reva, men det gjekk greit. Passerte Nordre Marholmen kl. 14.05. Hadde då hatt snittfart på nesten 8 knop frå Nordre Hunden.
Hadde no passeleg seglføring på kryssen og gjorde god fart sørover.

X-faktor etter runding av Nordre Marholmen. Foto: Mette Skjellanger

Kunne etter kvart stikka litt i skjøtet og låg i ca 7 knop.
På Mangersfjorden minka vinden til 6-7 m/s og eg kunne etterkvart ha full seglføring igjen.
Passerte Blodflua i Bognestraumen kl. 15:25. Dette vart også målpassering då det viste seg å vera umogeleg å segla gjennom Bognestraumen på grunn av svært lite/varierande vind og bortimot 2 knop motstraum.
Var ganske sliten etter denne seglasen. Trimmelina i storseglet slitna, elles alt OK med båt, utstyr og mannskap.
Resultatliste.

X-faktor på veg ut igjen til Manger etter målgang. Morkevika i bakgrunnen.

Norgeshus Seilmakeren doublehanded 2018

Video frå Seilmakeren doublehanded 25. og 26.mai 2018.
Meir info og resultatliste finn du her.
Det gjekk svært bra til me var nord for Espevær på veg nordover. Her fekk me eit par korte periodar med lite/ingen vind medan dei fleste andre segla godt. Av trackinga viser det også at me burde segla utanfor Austevoll og inn Korsfjorden. Men, men, det er val me gjer undervegs som av og til viser seg å vera feil.
Her er sporet vårt:

Sporet ved Espevær og runding RAMSHOLMANE. Lens frå havet inn mot merket, deretter kryss nordover.

Spor frå Espevær og nordover

Nordover: Vest for Hiskjo fekk me ei lita stund med vindstille. Deretter segla me NV lenger ut.

Nordover: Slo SV for Goddo og segla mot Stolmen

Spora gjennom Austevoll

Spora nordre del av Austevoll og Korsfjorden.

NHS Vårregatta 13.mai 2018

Årets første klubbregatta i Nordhordland seilforening. 7 båtar stilte til start.
Mannskap i dag var barnebarn Johannes 9 år. Stor stas å vera med farfar på regatta.
Løpet me skulle segla var start ved Tjuvholmen, så rundt Sæbøflua og tilbake til Tjuvholmen. Litt over 7 nm.
Det var meldt lite og rotete vind, så dette vart spennande. I starten var det ca 2 m/s frå S/SØ. Platt lens. Me kom greit ut frå start for babord halsar. Mathilda kom for styrbord halsar og me måtte vika.
Rota fælt før me fekk opp spinnakeren. Gjekk fint nordover når spinnakeren først kom opp. Eit par jibbar ut mot Sæbøflua gjekk fint, og me runda flua som første båt.

Bilde tatt av Bjørn ombord i Mathilda. Framme ser me at X-faktor har tatt ned spinnakeren og rundar Sæbøflua.

No vart det kryssing sørover. Segla no mot Meland/Ådlandsvågen. Ville ikkje segla for nært land og slo. Dette var lite lurt og både Kilroy og Mathilda segla forbi oss. Det minka på vinden, og me segla kryss mot Vetås. Kilroy fekk bra forsprang på Mathilda og X-faktor som låg ganske likt no.
Etterkvart kunne me sjå at dei bakerste båtane hadde fått opp spinnaker og kom lensande innover fjorden. Etterkvart kom denne vinden også til oss. No var det å få tre om spinnakerskjøter og fall og få opp igjen spinnakeren. Dette gjekk bra og me segla mot mål i 4 - 5 m/s frå NV. Sleit litt i nokre jibbar. Kommentar frå Johannes: "Farfar, koffår løper du ?? "
Me nærma oss Kilroy før målpassering og var berre 50 sek. bak.
Mathilda vant til tross for litt problemer nordover og ved runding. X-faktor fekk 2.plass og Kilroy på tredje.
Tross periodar med veldig lite vind, vart det ein spennande regatta. Me brukte 2 timar og 20 minutt.
Resultatlista finn du her. Rapport på NHS si side er her.

Johannes tar stolt imot pokal for 2.plassen.

Huftarøy rundt 10.mai 2018

Huftarøy rundt tel med i Shorthandedrankinga så eg meldte på X-faktor i doublehandedklassen. Eivind Tysse stillte opp som mannskap.
8 båtar var påmeldt i DH-klassen. 18 båtar totalt i regattaen.
Det striregna heile tida og vinden varierte mellom 2-3 m/s og 0 m/s.
Me hadde bra posisjon i starten og kom godt ut med fri vind. Løp 1 mot Hufthamar.
Midt i fjorden låg me og kniva med X-41 Sval om å vera fremst i feltet. Dette såg bra ut. Etter kvart kunne med setja spinnaker. Når me nærma oss Trollsøykalven vart det for skarpt og det var opp igjen med genoaen. First 36.7, Vilja, som var i vår klasse hadde no passert oss, men me låg rett bak.
Det vart avkorting ved Lindholmen som var første merke. Vinden daua no heilt vekk, og det vart mykje reking mot slutten. Vilja greidde å få 16 minuttar på oss inn til mål, og det held til seier for Vilja.
Me kom på ein hederleg 2.plass i klassen. 3.plass overall.
Det må me sei oss fornøgde med.

Har ingen bilder enno. Kjem kanskje nokon seinare.

Resultatliste

Tracking (RaceQ)