torsdag 30. juli 2015

Nokre bilder frå sommartur til Stavanger juli 2015

Kaldt når me gjekk frå Bergen til Bekkjarvik søndag 19.juli
Passering Slåtterøy fyr på veg tl Haugesund mandag 20.juli.
I Skudesneshavn onsdag 22.juli.
Over Boknafjorden på veg til Stavanger torsdag 23.juli
I Stavanger fekk me liggja i hamna til Seilforeningen 1928.
Selfie på Bømlafjorden på veg frå Haugesund til Lervik laurdag 25.juli.
Spor nordover Nyleia mandag 27.juli. Me segla i lag med Serenity.
Askøy seilsportsenter om kvelden tirsdag 28.juli.
Onsdag 29.juli var me heime på Manger igjen.

søndag 5. juli 2015

Shetland Race 2015 - rapport og bilder


I år var X-faktor påmeldt i doublehandedklassen med Eivind Tysse og eg som mannskap. I alt var det i år påmeldt 30 båtar og av desse stillte 4 i DH-klassen. Desse var Astragale, ein Class40 frå Austlandet, Amelia, Kelso og X-faktor.
Det var god nordavind når eg segla frå Bergen Hamn etter skipparmøtet og til Bergens seilforening der eg skulle liggja til onsdag. Eivind kom tirsdag kveld. Onsdag kl. 10.15 tøffa me utover mot Marsteinen. Det var meldt 9 - 10 m/s NV vind. Denne vindstyrken skulle halda seg omlag halve vegen og dreia på vest.
Vinden var ikkje meir enn ca 8 m/s når starten gjekk kl. 13. Me sette fullt storsegl og 3'ar. Me tok ein runde inn mot Sund-landet når me skulle setja genoaen og måtte segla full fart mot startlinja for å nå starten. Me segla så langt nordover som mogeleg med stikk i skjøtet og full fart. Me var vel mellom dei båtane som segla lengt nord.
Etter ca. 1/4 av distansen til Shetland hadde vinden dreia såpass mot vest at me kryssa layline og kom sørom linja. Ein del båtar
slo etterkvart og segla seg nordover. Dette ville me unngå då mange fekk dårleg kryssvinkel. Me venta på vinddreiing og segla dermed ganske lang sørover. Her er trackinga rett etter at me slo.

Vinden minka no og det vart etterkvart svært lite, og ei stund ingen vind.
Me kunne ikkje sjå andre båtar og lurte no på om me hadde gått for langt sørover. Kanskje dei andre båtane var lenger nord og hadde god vind?
Det hadde dei nok ikkje. Me gjekk mot ei ny natt på veg til Shetland. Værmeldinga gjekk ut på at vinden skulle koma igjen frå SØ. Dette hadde me tatt med i berekninga. Etter ei god stund med vindstilla kom den meldte vinden. I eitt-tida natt til fredag kom vinden opp i 2 m/s og me kunne setja spinnaker. Vinden auka heile tida. Me segla no rett vestover med kurs mot Sumburgh head. Me segla denne kursen til me kunne jibba og ha kurs mot Bard head. Etter at me jibba kom vinden opp i ca. 8 m/s og me segla i opp mot 10 knop mot Lerwick.

Me gjekk i mål kl. 05.53 etter ca. 41 timars seglas. Det skulle visa seg å halda til 1.plass på 1.etappe. Me hadde 22 minutt tilgode på Astragale på korrigert tid. Stor stas! Dette er 4. året på rad at me har klassesier på etappen Bergen - Shetland.



Fredag gjekk stort sett med til å kvila ut etter seglasen. Det hadde gått fint på turen over og alt virka som det skulle og ingenting gjekk i stykker. Det einaste var at VHF'en ikkje virka når me skulle rapportera på 0-graden. Då måtte me bruka den handholdte VHF'en og melda frå til Kilroy om at dei måtte rapportera til Shetland coastguard for oss. Det viste seg at tale-knappen på VHF'en hadde losna. Det var berre å finna fram loddebolten og lodda den fast igjen så virka den fint.

Fredag ettermiddag var det tid for premieutdelingg. I år i Town Hall. Det var stiligt.

Laurdag sov me også lenge, men kom oss etterkvart på New Harbour Cafe og fekk oss frokost. Deretter vart det litt shopping og gåtur til Coop'en for å proviantera for heimturen.

Etter lunch var det igjen tid for litt avslapping i båten. Då fekk me hyggeleg besøk av Tommy Allan. Han inviterte oss på frukost søndag før returen.

Laurdag kveld var 4 av Nordhordland-båtane samla til middag på Hay's Dock Cafe Restaurant.


Etter ein god frukost heime hos Tommy og Noelle var me klar for å starta på returen.
I starten var det meldt Sør/søraust vind opp i 10 m/s og etterkvart skulle det verta mykje regn.

Her har me kome utpå.
Fekk etterkvart opp segl. Satsa på 3'ar og eitt rev i storen.

Tommy og Noelle var utpå med gummibåt og kom bort til oss med niste som dei hadde laga til oss !!

Strategien vår var å starta heilt borte ved fergekaien på Brassay og at me då kunne stå rett sørover sundet for babord halsar. God plan, men det var mange som starta for styrbord halsar og me måtte vika heile tida. Stress med berre 2 ombord.


Me fekk etterkvart fart i båten.
Her er ein del flotte bilder som vart tatt av oss rett etter start:

Her er sporet vårt på returen.

Den sør/søraustlege vinden i starten skulle etter kvart dreia. Me starta derfor med å segla litt nordover. Seinare vart me tvinga over til ein meir sørleg kurs. Før denne dreiinga måtte me endra kurs p.g.a. eit seismikkskip. Me fekk beskjed om å endra til kurs 65 grader inntil me fekk ny beskjed. Me kunne sjå seismikkskipet på AIS'en. Etter å ha segla kurs 65 grader ei god stund kalla me opp seismikkskipet. Jaudå me kunne gå tilbake til opprinneleg kurs. Dei hadde gløymd å gi beskjed.
Når me nærma oss Norskerenna minka det på vinden. Me rekna med å verta tatt nordover med straumen. Dette stemte og me fekk ein fin bue og stod opp mot Marsteinen. Me berekna å vera i mål kl. 20.30 mandag kveld. Vinden minka mykje og det vart omtrent stillt. Me sleit oss over målstreken kl. 21.53 med ein fart på 0,5 knop i sjøen og 1,7 knop over grunn.
Dette var ein tålmodighetsprøve.
Returen tok ca. 34 timar.
Astragale hadde gunstige forhold på heimturen og var desidert raskast av alle båtane.
Det var dermed 2.plass i DH-klassen både på returen og samanlagt.
Det skal me vera svært nøgde med.
Takk til co-skippar Eivind for igjen å ha gjort ein kjempejobb.





fredag 19. juni 2015

Shetland Race 2015

X-faktor er snart klar for Shetland Race 2015.
I år vert det doublehanded med Eivind Tysse og eg som mannskap.
I alt er det påmeldt 30 båtar. Av desse seglar 4 båtar i doublehandedklassen.
Starten går onsdag 24.juni kl. 13.00 ved Marsteinen.
Meir opplysningar og tracking vil du finna her:
http://www.sailracesystem.no/regatta?regatta=1710

Her eit par bilder frå 2012 når Eivind og eg også segla doublehanded og vant overall på etappen Bergen-Shetland.
X-faktor forhold !

mandag 1. juni 2015

"Rormannen" singlehandedregatta

Laurdag 30.mai arrangerte Nordhordland seilforening singlehandedregattaen "Rormannen".
Idéen til denne regattaen fekk me vel etter å ha følgd med på "Silverrudder" i Danmark i fjor haust. Bjørn hadde laga forskjellige løp etter kva vindstyrke og retning som var meldt. Påmelding vart gjort via SMS og starten gjekk på klokkeslett uten bruk av startprosedyre og flagg m.m. Værmeldinga ved "Duene" var nordleg vind 7 m/s om morgonen så kl. 7 laurdagsmorfon fekk me som var påmeldt SMS om kva løp som skulle seglast. Det vart start ved Kvernane kl. 10.
5 båtar stillte til start: FS2, Mathilda, Kilroy, Steam og X-faktor.
Vilden kom akkurat i tide i startområdet og me la avgårde i 2 - 3 m/s nordleg vind. X-faktor kom best ut frå start og leda til me kom tvers av Hilland. Då gjekk Kilroy opp i ledelsen. Ved Sæbøflua minka det litt på vinden og det vart litt rotete vindforhold. Kilroy hadde lite vind ved Radøylandet medan X-faktor hadde meir vind ved Holsnøy-landet. Mathilda og FS2 tok no innpå.
Gjennom Bognestraumen gjekk det greit med eit par slag og god medstraum.
På Mangersfjorden tok vinden seg etterkvart opp. Kilroy leda an. X-faktor, FS2 og Mathilda hakk ihel.

Her er AIS-sporet til X-faktor (har ikkje laga spor frå Vetås til Bognestraumen.












Fine forhold på Mangersfjorden:



Etter eit par slag på Mangerfjorden sto eg opp forbi Skjelanger og segla retning litt nord for Stureterminalen før eg måtte slå. Dette gjekk bra.

Vinden var no oppe i 7 m/s og eg segla med tung genoa 1. Kilroy måtte no byta forsegl frå 1'ar til 3'ar. Dette tok tid og X-faktor var fremst i feltet. Når me nærma oss Marholmen nord i Øygarden vart eg forbisegla av FS2. Vinden var no oppe i 7 - 8 m/s og seglføringa var i meste laget.

X-faktor runda Marholmen rett bak FS2. Kilroy nærma seg igjen etter å ha fått opp genoa 3. Mathilda var heller ikkje langt bak og har jo lågt rating-tal!

Etter runding fann eg fram spinnakeren og sette opp spinnakerbommen. Var førstemann oppe med spinnaker og det var full fart mot Skjelangersundet. FS2 drøya litt med å setja så no var eg oppe på sida av han. Litt bygevær når me segla innover fjorden og vinden var på det meste oppe i 11 m/s og loggen viste opp mot 9 knop. Autopiloten styrte.
Mathilda og Kilroy sette ikkje spinnaker i Hjeltefjorden.
Det vart ganske platt lens så spinnakeren tvinna seg rundt forstaget nokre gonger, men eg fekk det ut igjen kvar gong.
Var litt spent når X-faktor og FS2 segla jamsides inn i Skjelangersundet.

FS2 for fulle segl inn i Skjelangersundet:

No vart det mindre sjø og lettare å kontrollera spinnakeren. Ved Ringholmen jibba eg og segla vidare mot Det Naudar.

Passering Det Naudar:

Ny jibb og vidare innover Herdlefjorden:

Eg segla nok litt for nær Øpso. Her var det lite vind. Vidare gjekk det i rykk og napp sørover i kraftige regnbyger.
No hadde også Mathilda og Kilroy fått opp spinnaker og hadde nok meir vind og tok innpå.

No fekk me melding om at det vart avkorting ved 60 grader 31 minutt. Ca. ved Holmeknappen.
FS2 passerte dette punktet eit par sekund før X-faktor. Hadde no segla i 6 timar og 12 minutt. Utsegla distanse var 34,8 nm.

Dette held til 2.plass etter Mathilda. Resultat finn du her.

søndag 24. mai 2015

Seilmakeren doublehanded 2015

Torsdag 21.mai gjekk eg til Askøy seilsportsenter for å vera med på Seilmakeren doublehanded for 9.gang.
Torkjell Tolo skulle vera mannskap og kom fredag morgon. Deretter var det informasjonsmøte og værbriefing. Det kom til å verta meir vind enn meldt tidlegare og vinden ville dreie på returen slik at me fekk medvind begge vegar. Dette kom til å verta ein rask seglas.
Strategien vår var å segla kortaste veg: Innom dei yste skjæra i Rongevær, Brosmeosen, langs Byrknes så lang aust som mogeleg for å få kortast seglas og Sognefjorden. Deretter litt avstand til Nåra, inn i Ytre Steinsund, Skomakaren, innom Geita, mellom Alden og Tvibyrge (nærast Tvibyrge), vestom Askrova.
Me følgde strategien vår og av trackinga kan eg sjå at me var mellom dei båtane som segla kortaste distanse på strekninga nordover. På heile seglasen var det berre Klungrehaug/Book og Rise/Rise som hadde kortare seglas enn oss. Snittfart på vegen nordover var 7,6 knop. Toppfart 9,2 knop.
Bildet øverst er tatt av Trond J Hansen ikkje lenge etter start. Me fekk opp spinnaker og segla i god fart nordover Hjeltefjorden. I og med at det fjæra prøvde me å halda oss på austre sida etter Skjelanger. Etter 2 timar hadde me segla distansen Ramsøy - Onglesundet (Marøy)! Ved Fedje auka vinden på slik at me måtte ta ned spinnakeren. Segla no med 3'ar og fullt storsegl. Sitaren, som me segla jamsides med i heile regattaen, segla innom Rongevær. Me segla kun innom dei yste skjæra. Når me kom i Brosmeosen var me jamsides igjen. Ein del båtar segla lenger vest men tok likevel peiling på Ytre Steinsund. Det trur eg dei ikkje vann noko på. Rotete vind ved innseglinga til sundet. Me held god avstand til Nåra og kom oss greit inn i sundet. I slutten av sundet prøvde me spinnaker ei stund. Det gjekk bra.
Vidare sengla me over Lågøyfjorden mot Skomakaren. Me segla ikkje gjennom Skomakaren, men rett austom. Vidare over Buefjorden, Austom Geita og vidare nordover. Me måtte no ha eitt eller to rev i storseglet. Det gjekk greit forbi Alden. Så bar det norover Stavfjorden mot Kvannskjeret. Me gjekk rett austom Tussen.
Her nærmar me oss Askrova. Ein X-35 frå Stavanger seglar ved sida av oss.
Torkjell til rors. Alden i bakgrunnen.


Etter Kvannskjeret sette me spinnaker, segla austom Store Stårøya, gjennom Nakkøyosen og i mål med spinnaker.
Mange var sikkert trøytte og leie no for det var ikkje så mange som sette spinnaker på dette strekket.
Me var i mål ved Stabben kl. 20.37.46 etter 9 timar og 37 min. seglas frå Ramsøy !
Så var det ein halvtimes seglas inn til Florø for å få oss mat og kvila litt.
Restart for oss vart då kl. 01.37.46. så me sto opp kl. 00.15. Fekk oss litt mat og så var det å koma seg ut igjen til Stabben.
No hadde vinden auka kraftigt på i ein vest-nordvestleg retning. Det var godt å ha god til ut til Stabben. Me stampa oss utover i 3 - 4 knop.
Korleis skulle me gripa an dette? Vindmålaren virka ikkje. Var kanskje like greit. Me fekk i ettertid høyra at vindstyrken var oppe i 18 - 19 m/s i startområdet.
Når starttidspunktet nærma seg la me oss opp mot vinden og fekk opp storseglet med 2 rev. Dette gjekk bra og eit par minuttar etter tida kom me oss avgårde. Rett etter Stabben tok me ei kuvending for å få jibba storseglet. Det gjekk bra og me fossa avgårde i 8-9 knop for berre storsegl med 2 rev.
Sitaren segla ved sida av oss. Me segla no litt lenger ut Rekstafjorden slik at me kom i kvit sektor på lykta på Kvannskjeret før me sette kursen sørover.
Det var no stummande mørkt og blas stiv/sterk kuling.
Kom oss over Stavfjorden. Segla no på vestsida av Tussen. Elles same rute som nordover.
Når me gjekk gjennom Skomakaren sette me 3'aren og tok ut eitt rev i Storseglet.
Her fossar me inn i Ytre Steinsundet i lag med Sitaren:

I slutten av Steinsundet var det spinnakerforhold og me heiste. I heisinga klikka skjøtet seg av og me måtte ta ned igjen for å ordna det.
Dette fekk Cermedez med seg og filma !

Me fekk raskt opp igjen spinnakeren og segla forbi Ytre Steinsund lykt og vidare mot Sogneoksen med spinnaker. Etter kvart vart dette for heftigt og det vart genoa 3 igjen. Så bar det gjennom Brosmeosen og vidare mot Rongevær.
Her seglar me forbi Vetegjøgraskjæret lykt (Rongevær/Mikkelboen)

Ikkje lenger etter dette sette me spinnaker og segla med den i mål ved Ramsøy.
Me gjekk i mål laurdag kl. 11.08.46. Returen tok altså 9 timar og 31 minutt !

Dette held til 4.plass i vår klasse og 5.plass overall. Det må me vera fornøyd med.
I vår klasse vant Seayou, ein planande Seascape 27, Wickmann-karane med sin Express på 2.plass og Siraren på 3.plass. Overall kom også Ventus med Klungrehaug/Book framfor oss. Her finn du resultatliste, tracking m.m. Trackinga kan kjørast i reprise. Bruk f.eks. speed 50.

På heimtusen hadde me litt vibrasjon/lyd i båten. På grunn av fæla vær gjekk det lang tid før me fant ut kva dette var for noko. I Hjeltefjorden var eg nede i motoren og såg at girkabelen hadde knekt og propellen hadde gått rundt heile vegen!!
Girkabelen må ha knekt idet me stoppa motoren og sette i revers ved start.
Når me gjekk inn i hamna på Askøy sat Torkjell nede i motorrommet og gira. Me reiste til Maritim på Damsgård og fekk tak i ny kabel. Torkjell fekk denne på plass og etter litt justering virka det fink. Takk Torkjell. Takk også for hard og god jobbing på seglasen.
Me er seige og uthaldande karar og det trengs på ein slik regatta. Gir aldri opp og er alltid klare til å setja spinnaker.