Ny motor og nytt segldrev oktober 2025. Kort YouTube-video

Ref. artikkel som eg la ut 8.oktober 2025: https://x-faktornor9341.blogspot.com/2025/10/ny-motor-og-segldrev.html

Mangersfjorden - Hjeltefjorden 30.oktober 2025

Ein kort segltur frå Mangerøy mot Stureterminalen i Øygarden og tilbake torsdag 30.oktober 2025 i varierande nordavind.

 

Vinnar av Vestland seilkrets sin Vestland Cup Storbåt-aktiv Shorthanded 2025

 

Regattaene som inngår i cupen er som følger:

1.Huftarøy Rundt

2.Bergen RW

3.Askøy Rundt

4.Askeladden

5.Høststormseilasen

6.Windjammer

X-faktor deltok i Huftarøy rundt, Askøy rundt, Høststormseilasen og Windjammer.

Bergen RW vart avlyst.

Eivind Tysse segla doublehanded med meg i alle fire regattaene i cupen. På Høststormseilasen hadde me seier i DH-klassen og på Windjammer hadde me klasseseier og overallseier.

Torsdag 16.oktober var det premieutdeling for både Høststormseilasen og Vestland Cup hos Seilmaker Iversen.

Pokal og vandrepokal for Vestland Cup Shorthanded og pokal for Høststormseilasen.

Resultatliste

Windjammer Race 11.oktober 2025

 Windjammer skulle eigentleg gå 4.oktober 2025, men uværet "Amy" gjorde at Stord seilforening utsette regattaen til 11.oktober. 4.oktober stod X-faktor på land etter at me hadde installert ny motor og segldrev. Sjøsetjinga vart også utsett p.g.a. uværet til 7.oktober. 11.oktober var X-faktor dermed klar til å delta på Windjammer. Eivind kunne vera med slik at me segla i doublehanded-klassen. I Vestland seilkrets sin Vestland Cup 2025 for storbåt-aktiv, klasse Shorthanded, låg me på 3.plass. Asterix, båten som leda, var seld, og me hadde dermed mogelegheit for å rykkja opp til 2. eller 1.plass.

Torsdag 9.oktober gjekk eg frå Manger til Bergens seilforening. Det blas 13-14 m/s frå vest i Mangersfjorden, men lenger sørover var det ikkje so gale. Eg dreiv med innkøyring av nye motoren. Brukte 4 timar til Hjellestad. Fredag starta eg kl. 9.30 og var framme i Leirvik på Stord kl. 14.15.

Eivind kom laurdag morgon og me gjorde oss klare til regatta. 18 båtar var påmeldt. 6 av desse i DH-klassen. Det var meldt vestleg vind rundt 5 m/s og opphaldsvær når me segla. Starten i Leirvik hamn gjekk kl. 12.00. Me heiste spinnakeren rett før startsignalet og kom greit ut. Når me runda Ytstøy og sette kursen mot Hillekalven  låg me bak Sheep Dip, Levens og Aquasense. Storm segla etterkvart forbi oss. Liten videosnutt: https://photos.app.goo.gl/JNhvwNDW78WbHFxu7  

Ved Fluholmane tok me ned spinnakeren og segla med Genoa 1. Det gjekk på eitt legg til Søre Illholmen med litt stikk i skjøtet. Farten var oppe i 7 knop.

X-faktor. Elan 37 Storm framfor. Foto: Magnus Mjøs

 

Vinden minka ved runding av Søre Illholmen, men tok seg opp igjen etterkvart. No vart det trikkekjøring med Genoa 1 mot mål i Leirvik hamn. Farten låg mellom 6,5 og 7 knop. 

Ny videosnutt: https://photos.app.goo.gl/8po1z17DVSy7Uvse6

Vinden minka inne i hamna, men me segla i mål kl. 14.41.08.

X-faktor sitt spor frå Marinetraffic

Sheep Dip, Aquasense, Levens, Storm og Frøken Smilla var før oss i mål, men på korrigert tid vann X-faktor DH-klassen og også overall !!

Frå premieutdelinga laurdag kveld. Pokalen er vandrepokal for overall-siger.

Resultatliste Windjammer Race 2025

Stor takk til Eivind Tysse som har segla doublehanded med meg på regattaene i Vestland Cup: Huftarøy rundt, Askøy rundt, Høststormseilasen og Windjammer race.

Søndag starta eg frå Leirvik kl. 7.45 og var på Manger kl. 16.15. 

Ny motor og nytt segldrev

Motoren i X-faktor, Yanmar 3GM30FC (27hk), er frå 1998. Det same er segldrevet Yanmar SD20. Motoren er bra, men brukar litt olja. Segldrevet må ha nye tetningspakningar, og det er mogeleg at akslingen er litt slitt (akslingen vart skifta i 2019). Belgen vart skifta i 2017, og det er derfor tid for å skifta den igjen. Vurderinga vart at det var tid for å skifta motor og segldrev. Bildøy Båt og Motor hadde kampanje slik at det var rabatt på prisen. Den gamle motoren og segldrevet skulle også vera mogeleg å selja på finn. (Motoren er seld. Segldrevet ligg på finn.no). Båten skulle løftast på land på Bildøy, men Eivind og eg skulle gjera jobben. Bildøy Båt og motor skulle løfta ut den gamle motoren og inn den nye. Elles var dei der dersom me trong hjelp.

Mandag 29.september vart X-faktor løfta på land rundt lunchtid.

X-faktor å land på Bildøy

Me sette i gong og fekk fram motoren og tatt ut segldrevet på mandag.

Segldrevet, Yanmar SD20, er tatt ut

Den gamle motoren er tatt fram, og er klar for å løftast ut.

Tirsdag 30.september om morgonen vart motoren løfta ut. Eg hadde fått kjøpar til motoren, so den vart henta av kjøpar etter at den var løfta ut.

No var det reingjering og klargjering til å få inn nye saker.

Nye segldrevet , YANMAR SD25, og den nye motoren, YANMAR 3YM30AE (29hk), kom på plass på tirsdag.

Dieselfilter, peilepinne for motorolja og impeller ligg lett tilgjengeleg på framsida av motoren. Dette er stor betring frå den gamle motorn.

Segldrevet er prima og påført Jotun drevspray. Glassfiberplata rundt drevet er limt på igjen og bunnsmurd med koparfritt bunnstoff. Propellen er montert på igjen og polert.

Onsdag 1.oktober  gjekk med til kobling og montering.

Nytt instrumentpanel med turteljar og timeteljar.

Torsdag 2.oktober vart eksosbenn og ny eksosslange frå bennet til lydpotta montert. Motorluka vart montert på plass igjen og båten vart rydda.

Sjøsetjing skulle vera fredag 3.oktober, men vart utsett på grunn av uværet Amy.

Tirsdag 7.oktober vart X-faktor sjøsett. Bildøy Båt og Motor kontrollerte og dokumenterte monteringa, starta opp motoren og var med på prøvekjøring. Deretter gjekk turen til Manger. Stor takk til Eivind som gjorde ein kjempejobb.

Videosnutt på veg til Manger: https://photos.app.goo.gl/KQGUCCy87uYZ9TVz8

YouTube-video Høststormseilasen 2025 ombord i X-332 X-faktor

Her er YouTube-videoen frå Høststormseilasen 2025.

Etter å ha lagt ute i vel 3 døgn er videoen den mest sette av dei nylege videoane eg har lagt ut.

Det har vore 1.300 avspelingar av videoen.

Det var etter at eg delte den på X-332 Klubben si side at det tok av.

Eg har no passert 600 følgjarar på YouTube kanalen min.

Treng fleire. Det kostar ingenting. 

http://www.youtube.com/@HaraldMatland

Høststormseilasen 13. og 14.september 2025

 Den tradisjonsrike regattaen Høststormseilasen vart arrangert av Nordhordland seilforening 13. og 14.september 2025. Regattaen vart første gong arrangert i 1993. 

33 båtar var påmeldt. 10 av desse i Doublehandedkassen der X-faktor var påmeldt. Start laurdag og målgang søndag var i Mangersfjorden, og målgang laurdag og start søndag var ved Kilstraumen i Austrheim.

Ombord i X-faktor var Eivind og eg. Laurdag var det meldt sørleg vind. Ute ved Rongevær var det meldt 10 m/s med vindkast på 15 m/s. Starten kl. 12.00 gjekk i år utanfor Husebøvågen. Det var ei god løysing. Me fekk ikkje heilt med oss at det var fleire startar, men såg klasseflagg D som var DH-klassen, og me var i første start. Fekk ein god start. Eg meiner me var første båt over startlina, og fekk opp spinnakeren. No segla me utover Hjeltefjorden.

Utover Hjeltefjorden (Foto: Jon Ingar Kjenes)

Utover Hjeltefjorden. Sheep dip og Ren Glede framfor. (Foto: Jon Ingar Kjenes)

Me runda Svartskjera lengst nord på Radøy, og segla mot Kyrkjeflua i Austrheim. Me jibba spinnakeren ved runding der og held fram mot Mikkelsbåen ydst i Rongeværet. Me segla no spinnaker for babord halser.

På veg mot Kyrkjeflua. Foto Jon Ingar Kjenes

Når me nærma oss Mikkelsbåen planla me korleis me skulle jibba. Det blas no 10-11 m/s. Plutseleg kom det voldsom vind og me brocha. Vindmålaren viste 15 m/s. Fekk etterkvart styring på båten og vinden i hekken. Fekk ned spinnakeren, og jibba storseglet. Sette no kurs mot Hillesøyflua lykt inne i Fensfjorden. Me segla no for berre storsegl i stor fart. Fekk etterkvart opp genoaen (den tunge #1) og etter ei stund også opp igjen spinnakeren (uten å få BH !). Me kom frå dette utan skadar på korkje  mannskap eller utstyr. Det var ein del spinnakerar som rauk i denne vinden som stod på som verst i ca 10 minuttar.

Bilde lånt frå NHS si side. Foto: Bjørn Flataker

Ved runding Hillesøyflua hadde vinden minka mykje, og det vart no ein kryss i til dels svært lite vind mot mål i Kilstraumen. Målgang vart avkorta ved Storestonga før innløpet til Kilstraumen.

X-faktor ved målgang laurdag.

X-faktor var i mål som båt nr. 4 av alle båtane. No var det samling i Kilstraumen, flott middag og premieutdeling og prat hos Kilstraumen Brygge.

Resultat DH-klassen laurdag. Mathilda slo oss med litt over 6 minuttar på korrigert tid laurdag. Mathilda og X-faktor hadde dei to beste korrigerte tidene laurdag av alle båtane !

Spor laurdag frå Mangersfjorden til Kilstraumen

Søndag var det meldt roleg vind og flott vær. Starten gjekk kl. 11 ved Vardetangen i svært lite vind. Spinnakerseglas. 

Rett etter start søndag. Ren Glede og X-faktor til høgre i bildet. (foto: Jon Ingar Kjenes)

Me fekk omsider fri vind, og segla mot Hillesøyflua stake. Etter ein jibb når me nærma oss Byrknesøy stod me fint mot rundingsmerket. Deretter var det skarp spinnakerslør mot Mikkelsbåen/Rongevær. Hadde god fart her og greidde å få litt avstand til Mathilda. Etter å ha passert Mikkelsbåen tok me ned spinnakeren og heiste den nye Genoa 1. No gjorde båtane forskjellige vegval. Eg hadde ein plan om å segla vidare mot Fedje. Dette gjekk bra. Eivind sjekka værmeldinga og såg at vinden skulle dreia litt på sørvest. Når me var vel halvveges over til Fedje slo me og segla i ein bue mot Kyrkjeflua. Såg at me segla betre enn båtane som slo seg sørover nær Austrheimlandet. Seglasen vart avkorta ved Kyrkjeflua. Me måtte ta eit lite slag rett før mål. Dette såg bra ut. Me var tredje båt i mål. Segla forbi Aquasense eit stykke før mål.

X-faktor segla forbi Aquasense rett før målpassering.

 Korleis låg Mathilda an?? Me følgde spent med etter å ha gått i mål. Ville dette halda til siger i dag?

Målpassering søndag ved Kyrkjeflua. (foto: Jon Ingar Kjenes)

Me prøvde å få med oss målpasseringa til Mathilda og rekna som besette. Jau dette skulle halda til siger søndag, og dermed til siger totalt i DH-klassen. X-faktor hadde beste korrigerte tid av alle båtane søndag.

Resultatlite DH-klassen søndag.

Resultatliste samanlagt Høststormseilasen 2025

Stor takk til Eivind som var co-skippar.

Spor søndag. (Manglar første delen)

Bergen singlehanded 2025 ombord i X-faktor

Stavanger singlehanded 2025 ombord i X-faktor YouTube video

Stavanger singlehanded 23.august 2025 OPPDATERT

Onsdag 20.august segla eg frå Manger til Mosterhamn, torsdag 21.august frå Mosterhamn til Stavanger. Her fekk X-faktor plass i Stavanger seilforening si hamn på Grasholmen. 

X-faktor i Stavanger seilforening på Grasholmen

God og lun hamn

Regattaen Stavanger singehanded skulle seglast laurdag 23.august. 12 båtar var påmeldt, 11 båtar deltok.

Kl. 9.30 på laurdag var det skipparmøte i klubbhuset. Starten skulle gå ved Breivik aust i Stavanger.  Det var meldt ein nordleg vind som etterkvart skulle dreia nordvestleg. 3 m/s ved start og deretter aukande til opp i 7 m/s med vindkast på opp i 10 m/s. Løpet skulle gå nordover  med start kl. 11.00, vidare babordrunding Kalvøy, deretter babordrunding Talgje og så sørover til mål ved Breivik. Løpet var omlag 25 nm.

Eg segla med den nye Genoa 1. Kom greit ut i starten og runda Marøysteinen kort etter start som båt nr. 3 etter Swan 42 og Levens. Deretter var det runding Kalvøy. Her var det lite vind og det hadde vore mogeleg å ha oppe spinnakeren i 10 minuttar. På austsida av Kalvøy tok vinden seg opp, og det vart kryssing nordover. Vinden låg for det meste på rundt 4 m/s, men var også nede i 2 m/s. Etter 11 slag segla eg mot nordvestre spissen av Talgje. Overstod litt og hadde god fart, over 7 knop, mot runding. Mithrandir var rett bak X-faktor. Swan 42 var eit godt stykke framom, medan Levens , Bavaria Match35 og Bashford 36 var ikkje lagt framfor. Eg skulle ha sett opp spinnakerbommen og rigga til for spinnakersetjing før runding. Det var høg fart og mykje bølgjer, så eg venta litt. Fekk etterkvart opp spinnakeren og segla på same hals til eg tok ned spinnakeren ved Vassøykalven før siste legget inn til mål då vinden vart 90-100 grader med vindkast opp i 10 m/s. Eg såg på båtane framfor at det var utfordrande å segla spinnaker på dette legget. Eg hadde god fart med genoa 1. X-faktor var i mål etter 4 timar 33 minutt og 55 sekund. Utsegla distanse 26 nm. Dette held til 3.plass etter J70 som vann og Swan 42 som tok 2.plassen 25 sekund før X-faktor. Eg var nøgd med seglinga mi i dag.

Spor Stavanger singlehanded 2025

Etter regattaen var det tilbake til Stavanger seilforening. Her hjelpte me kvarande å pakka segl, og deretter var det premieutdeling i klubbhuset.

Premieutdeling i klubbhuset.

Resultatliste

Spinnakerseglas sørover

Søndag segla eg frå Stavanger til Haugesund. Mandag vidare til Manger. Var i heimehamna kl. 22.40.

Askøy rundt - oppdatering

 X-faktor vart åleine i Singlehandedklassen til slutt, men no vert Eivind Tysse med og X-faktor byter til Doublehandedklassen. Der vert det no 9 båtar.

X-faktor påmeldt til Askøy rundt 16. og 17.august 2025

Det er pr. no påmeldt 36 båtar, men det er enno tid til å melda seg på.

X-faktor stiller i Singlehanded-klassen. Her er det påmeldt 3 båtar. Det er påmeldt 7 båtar i dubehandedklassen. https://sailracesystem.no/regatta?regatta=3926&deltagerliste=2

Starten går ved Bakarvågen laurdag kl. 12.00. Start på søndag vest for Herdla kl. 11.00.

Det er meldt fint vær og fine vindforhold.

Kosting av bunnen og filming for å sjå om det er bra

I dag har eg kosta bunnen, kjøl og ror på X-faktor.

Filma med GoPro kamera for å sjå om det vart bra.

 

Holsnøy rundt 7.juni 2025 - You tube video

NHS Klubbregatta HOLSNØY RUNDT 7.juni 2025

Laurdag 7.juni var det igjen klart for Holsnøy rundt. 8 båtar stilte til start ved Krossnessundbrua kl. 11.00.

Flott vær med ein SV bris som skulle auka litt utover og dreia meir vestleg. Når vinddreiinga kom var det ein periode med svært lite vind. Eg segla X-faktor singlehanded, og var i mål i Bognestraumen etter 3 timar og 9 minutts seglas. 

På Mangersfjorden etter målgang. Foto: Atle Syslak

Foto: Reidar Nesse

Her er resultatlista:

Stord shorthanded 31.mai 2025

Etter å ha segla Huftarøy rundt 29.mai låg X-faktor i Os seilforening natt til 30.mai. Om morgonen segla Eivind og eg til Leirvik for å delta i Stord shorthanded. Me hadde ein flott seglas til Leirvik via Nyleia saman med Asterix. 

Laurdag var det fint vær. Starten gjekk kl. 12 i Leirvik hamn. 9 båtar var påmeldt. 5 i doublehandedklassen og 4 i singlehandedklassen. Eine båten som var påmeldt i singlehandedklassen møtte ikkje opp.

Eg laga ein YouTube video frå seglasen. Den har etter 2 dagar hatt over 1.000 visningar.

Her er resultatlista. Det vart ein til dels langdryg seglas, og nokre av båtane kom ikkje i mål.

Her er videoen 

Huftarøy rundt 29.mai 2025

Torsdag 29.mai 2025 segla me X-faktor i Huftarøy rundt. Me stilte i doublehandedklassen der det var 4 båtar. Tilsaman var det påmeldt 20 båtar til regattaen. Eg segla X-faktor til Hjellestad onsdag ettermiddag, og Eivind mønstra på torsdag morgon. Me tøffa sørover til Strøneosen der starten skulle gå kl. 10.50.

Startane i Strøneosen er ikkje noko å skryta av med nokre overettmerker på land og ein startbåt som styrbord merke. Denne er i bevegese og det går ikkje an å pinga startlina på plottaren. Vindretningen var også slik at me starta på babord hals.

Me kom oss greit avgårde og segla mot Austevoll. Låg no godt plassert i feltet. No vart det kryss mot Tobbeholmane og Kalvsundboen. Her var det motstraum og me kunne med fordel halde oss nærare Austevollslandet slik Asterix gjorde.

Etter Kalvsundboen sette me spinnaker. Sjå YouTube video. Me segla spinnaker til Lindholmen nord for Hufthammar ferjekai. Deretter vart det slør til mål i Strønosen.

Her er X-faktor sitt spor frå Marinetraffic.

Me var i mål etter å ha segla i 4 timar 28 minutt og 18 sek. Dette held til 3.plass i doublehandedklassen, men også 3.plass av alle båtane.

Her er resultatlista

Her er litt YouTube film frå spinnakerseglinga. 4 minutt og 50 sekund ut i videoen er X-faktor oppe i over 8 knop.

Klasseseier i Seilmakeren doublehanded 2025

Seilmakeren DH 2025 starta kl. 17.00 fredag 23.mai i Hauglandsosen, Askøy. I år vart det sørleg løp med runding Ramsholmane nord for Haugesund og tilbake. Torkjell Tolo var mannskap i år også. Takk til Torkjell for god innsats.

Det vart ein rask seglas i år, med god vind heile vegen. Me var i mål kl 09.38.06 laurdag morgon etter å ha segla i 16 timar og 38 minutt.

Eg har laga ein YouTube video på 23.minutt. Filma mesteparten med GoPro Hero 9 og 10 som har god digital stabilisering, og som held horisonten stabil og gir inntrykk av båten sine bevegelsar.

Litt bilder:

X-faktor i Vatlestrumen. Foto: Jon Hardie

X-faktor i Vatlestrumen. Foto: Jon Hardie

Torkjell til rors

Nordhordland seilforening sin Vårregatta 3.mai 2025

Laurdag 3.mai arrangerte Nordhordland seilforening den årlege Vårregattaen på Mangersfjorden.

8 båtar stilte til start. X-faktor vart segla singlehanded. Løp 2 vart vald då det var meldt svært sterke vindkast ved Kvernane i Hjeltefjorden.

Her er YouTube-video frå regattaen filma ombord i X-faktor. Eg segla med 3'ar og eitt rev i storseglet. 

Hadde litt dårleg vegval etter start. Skulle tatt første slaget tidlegare. Etter runding ved Trettholmen hadde det vore spinnakerføre inn til Bognestraumen. Vinden varierte veldig både i styrke og tildels vindvinkel so eg sette ikkje spinnaker. Hadde me vore to ombord hadde det vore noko anna. X-faktor var først i mål etter 1 time og 26 minutt. Dette held ikkje til beste korrigerte tid.

Her kan du sjå fleire bilder frå regattaen: https://photos.app.goo.gl/s9D7z9LqAS1H6pcn6

Årets første treningsregatta i Nordhordland seilforening 29.april 2025

Årets første treningsregatta i NHS vart arrangert tysdag 29. april. Løp nr. 4: Start ved Krossnessundbrua, til runding ved Askeneset, runding ved Løypetona, runding ved Straumsneset (Askøy) og mål ved Krossnessundbrua. Det var meldt sørleg vind 6 m/s med vindkast på 12 m/s i starten. Litt minkande og dreiande SV/V. Regn, spesielt første delen.

7 båtar stilte til start. Eg segla X-faktor singlehanded. Etter start segla eg langs Nordhordlandsbrua. Vinden var oppe i 9 m/s. Eg segla med 3'ar og fullt storsegl. Etter å ha slått seglar eg mot Askøy. Slit ein del i den sterke vinden som var oppe i 11 m/s. Runda bøyen ved Askeneset som første båt framfor Søster Sol. No var det mot neset ved Løypetona. Vågde ikkje å heisa spinnaker på dette legget. Det gjekk unna i ca 7 knop. Etter runding var det kryss mot Straumsneset på Askøy. No var det motstraum, men greidde brukbare vinklar. Når eg nærma meg Askøy minka det på vinden. Var nede i 2 m/s ved runding. Etter runding k. 19.25 sette eg spinnaker og segla mot mål. Roleg til å begynna med, men vinden var oppe i 9 m/s, og vinden dreia litt att og fram mot vestleg vind. Var oppe i GPS fart på 8,6 knop og var i mål kl. 20.01.15. Tok ned spinnaker ved Frekhaug kaien, og rett etter det kom det ei kraftig vindråse. 

Her seglar eg mot mål etter å ha tatt ned spinnakeren:

X-faktor sitt spor frå Marinetraffic:

Var i hamn i Mangerøy kl. 22.30. Flott solnedgang når eg nærma med Bognestraumen.

Singlehandedtrening i Mangersfjorden og Hjeltefjorden 26.april

 

YouTube : Vinterlagring, stell og sjøsetjing 2024/2025

Velg 4K avspeling for beste kvalitet 

 

Ferdig bunnsmurd 23.mars

Ferdig bunnsmurd søndag 23.mars . 2 strøk med International VC Offshore EU Dover white. Brukte 4,5 time på jobben. Fargen skal verta kvitare ved sjøsetjing.

Presenningen er tatt av: Nærmar seg vårpuss

 I dag har eg vore på Litlebergen og tatt av presenningen.

Har tatt på ein liten duk over bommen. Vatn vert tilgjengeleg i båthamna no, og då vert det vasking, og etterkvart polering/voksing. Sjøsetjing vert 12.april.

Silverrudder 2024 - transportetappar Manger - Svendborg - Manger

Eg har laga ein video med bilder og videoar frå transportetappae frå Manger til Svendborg og retur til Manger i samband med Silverrudder 2024 i Danmark.